صور اسماء بنات

من أذكار الصباح والمساء

انا قلت قبل مانام اجبلكم شوية ادعيه واذكار 

فساتين سواريه

مجموعة فساتين سواريه اعجبتني قلت اجبهالكم

لفات طرح للمحجبات

ازيكم يا قمرات جبتلكم كام لفة طرحة عجبتني قلت افرجهالكم 

خدادية من عمايل إيديا

هااااااااااااي عليكم

شوفوا بقي كان عندي دبدوب اتقطع واتبهدل خالص هو صحيح غالي عليا بس منظره بقي مش حلو أبدا

شوفوا شكله قبل التعديل كان عامل ازاي

انا بقي طلعت كل الفايبر الي فيه 

وعملت منه بوك صغير وزوقته بالاسترس والورود

                                                       

والفايبر بقي عملت منه خدادية 

جبت مفرشين حطيتهم علي بعض وقفلتهم بالمكنة وسبت ناحية مفتوحة وحشيتهم بالفايبر اللي كان جوه الدبدوب وقفلت بعد كده عليهم بالمكنة برضو

ولزقت عليها استرس ايه رأيكم ........يارب تعجبكم 

زبادي بيتي

مساء الخير علي كل زوار ماما رهيبة 


عملت انهارده زبادي بيتي نضيف وجميل وسهل وكمان وفر عليا كتيييييييير

انا استخدمت حوالي كيلو لبن هما بالظبط عشر كوبايات مج بإيد تمام وكمان استخدمت زبادي نسله المبستر لان مكنش عندي زبادي بلدي بصراحه 

غليت اللبن وسبته لحد مابقي دافي يعني لا هو بارد ولا سخن دافي بس

وجبت 2 كوب زبادي نستله وقلبتهم بالمعلقه فطبق لحد ماطريوا خالص

ضفت الزبادي علي اللبن وقلبت كويس جدا 

سميت بالله وصبيت اللبن المضاف له الزبادي صبيته فاكواب وكنت مشغله الفرن الكهربا وموطياها علي درجة حراره 150 فرن كهربا يا جماعه يعني هاديه وكمان مش نار 

حطيت الكوبايات في صينية عادية ودخلتهم جوه الفرن الدافيه انتي ممكن تدفي فرن البوتاجاز وتحطيهم فيها بس علشان الشتا هتبرد بسرعه وهتضطري تطلعيهم وتدفيها تاني وتدخليهم تاني 

فانا قلت استخدم الفرن الكهربا علشان حرارتها وهي واطيه كانها دافيه بس وفعلا عدي حوالي 4 ساعات ووالله طلعت زبادي ماشاء الله عليه دخلته التلاجه وطلع زي العسل زي اللي بنشتريه بالظبط واتقل كمان وبالهنا والشفا مين عايزة كوباية

شوربة العدس

عملتلكم احلي شوربة عدس من مطبخي 

اولا تغسلي العدس كويس

بعد كده حطي عليه مايه وضيفي الأتي

بصلة 
طماطم
توم
جزر
بطاطس

وسيبي كل المكونات تغلي مع بعضها

اول ماتستوي كلها اطفي عليه واضربيهم ضربا مبرحا فالخلاط  وزوديهم بشوية ماية تاني 

وبعدها رجعيهم فالحلة تاني عالنار وجهزي الطشة دقي التوم وحمرية فشوية سمن بسيط عالنار وانزلي بيهم عالعدس 

وعملتلكم كمان بتنجان مخلل بالخل والتوم والليمون 

قطعت البتنجان والفلفل وسلقته واول ما طلع كنت مجهزة الخلطه توم بالشطه والكمون والخل والليمون واااااااااو روعه 
وجبت مخلل لفت عشان تكمل الأكله اتفضلوا معانا يا قمرات 

اللفت ده بيتي برضو هبقي انزلكم موضوعات كاملة عن المخللات وكله فسفرة ماما رهيبة ربنا مايحرمنا منها